Facebook bloqueou durante 10 anos a páxina do COMITÉ DE MEMORIA HISTÓRICA DA COMARCA DE CELANOVA (@memoria.celanova) despois de suprimir un post no que se lanzaba unha “alerta antifascista”.
O texto é o mesmo que o que publicou nas súas redes o Comité pola Memória Histórica do Val do Límia e que se distribuíu en Celanova o día da presentación dun libro (que branquea a figura dun falanxista e que publicado con cartos da Deputación de Ourense) na Fundación Curros Enríquez [ver abaixo o pasquín].
De feito, a denuncia foi un acto coordinado entre ambos Comités.
A única diferencia entre as publicacións é que na páxina @memoria.celanova advertíase desa “alerta antifascista”.
O pasado martes, día 25 de xuño, cinco minutos despois de suprimir ese post, Facebook eliminou a páxina do COMITÉ DE MEMORIA HISTÓRICA DA COMARCA DE CELANOVA, e até hoxe (unha semana despois) non recibimos resposta á nosa petición de explicacións.
Lembrámoslle a Facebook que somos unha asociación sen ánimo de lucro, legalmente constituída, e que traballa no ámbito dos Dereitos Humanos en colaboracións con outras asociacións e institucións públicas do Estado.
Descoñecemos as razóns que levaron a Facebook a nos privar dunha ferramenta básica na difusión do noso traballo e continuaremos reclamando a restitución da páxina, que non incumpriu ningunha das normas de publicación da rede social.
Solicitamos o voso apoio e a difusión desta petición.
E convidámosvos a seguir as informacións sobre a actividade de Comité a través de Facebook e Twitter (X) nas redes da web amiga adiante.gal: @adiante.gal (Facebook) e @adiante_gal (Twitter, X).
0 comentarios