Gerardo Testera Tovar faleceu onte en Ourense. Era neto de Gerardo Tovar Gris, palentino morto na Prisión Central de Celanova en 1941 e un dos 91 de San Breixo. Gerardo Testera Tovar, xubilado de Renfe, vivía no barrio de Vista Hermosa, en Ourense, desde hai cinco décadas.
En 2023, a través da súa familia en León, comezou a colaborar co Comité de Memoria Histórica da Comarca de Celanova. Sempre amable e solícito, en febreiro de 2025, xunto a Fernando Moure, familiar monfortino doutra das vítimas, participou no acto de presentación do memorial de San Breixo na Casa do Concello de Celanova. En marzo dese ano estivo presente na inauguración do memorial e, desde entón, mantivo un contacto constante co Comité.
O Comité expresa o seu máis sentido pésame a toda a familia. Enviámosvos unha forte aperta e todo o noso cariño nestes momentos.
0 comentarios