A memoria de Ramón Yáñez volve a Monforte

O Concello de Monforte de Lemos organiza un acto de homenaxe ao guerrilleiro monfortino RAMÓN YÁÑEZ PEREIRA, asasinado polas forzas de represión franquista o 13 de xullo de 1943 na Caseta de Ansemil (Celanova). O acto terá lugar na Casa da Cultura Poeta Lois Pereiro, o luns 11 de novembro ás oito da tarde.

A homenaxe dá continuidade á celebrada en Celanova o pasado mes de xullo, coincidindo co 81º aniversario da morte de Yáñez Pereira. O acto contará coa participación do alcalde de Monforte de Lemos e presidente da Deputación de Lugo, José Tomé Roca.

O artista plástico Baldomero Moreiras fará una presentación do cartel que honra a memoria do guerrilleiro, e o historiador Carlos Morais, do Comité pola Memória Histórica do Val do Límia, ofrecera unha conferencia sobre os resultados das súas investigacións sobre a figura de Ramón Yáñez, un dos xefes da guerrilla que operaba nos anos corenta na raia na área do Laboreiro.

Os colectivos memorialísticos do Val do Limia e da Terra de Celanova agradecen a implicación do Concello de Monforte de Lemos, imprescindíbel tanto no eido da divulgación da figura de Ramon Yáñez como na busca de familiares que poidan achegar novos datos sobre o guerrilleiro, tamén coñecido como O Médico.

Ramón Yáñez Pereira é unha das 90 vítimas da represión durante a guerra e a ditadura que o Comité de Memoria Histórica da Comarca de Celanova ten documentado o seu soterramento no cemiterio de San Breixo de Celanova e que, após do traballo conxunto co Grupo Histagra (USC), ficarán recoñocidas cun memorial que se instalará nos próximos meses nese camposanto, lugar de memoria.