O domingo 24 de setembro de 1939, dous días despois das execucións dos 7 asturianos no muro do cemiterio de San Breixo, a Bandera de Falange de Marruecos celebrou o día da Merced. Tamén na Prisión Central de Celanova decretouse festa aquel día.
“Al igual que en las demás Prisiones de España la Virgencita de la Merced recorrió por vez primera los amplios claustros posando sus maternales ojos sobre la población reclusa, ávida de amor y redención“, relata o correspondente de La Región nunha crónica publicada o 30 de setembro.
“A las nueve y media de la mañana el párroco de esta villa bendijo la hermosa imagen adquirida por suscripción popular. Acto seguido se organizó la procesión que se dirigió al rastrillo [da prisión] en donde esperaban una representación de reclusos con velas encendidas. La banda de la Bandera de Marruecos ejecutó en el trayecto bonitas y adecuadas composiciones. La llegada de la procesión al patio [o actual patio do Instituto] convertido en grandiosa capilla fue algo impresionante. Los reclusos al ver entre ellos a su excelsa Patrona prorrumpieron emocionados en cántico y vítores. ‘A Cristo su hijo de veras rogad que a estos tus hijos mire con piedad‘ cantaba el orfeón [o Indalecio Rodríguez Roibal, un dos membros do Orfeón, gardaba cama no Hospital despois de ter sido tiroteado o mércores anterior] y todos los reclusos como un solo hombre respondían: ‘Ave, ave, ave María”.
O Reverendo Padre Miguélez dedica a salve cantada polos presos ao dirtector da cadea, Don Vicente Fonturbel, conta o cronista. E o Reverendo Padre Munárriz dá lectura ao decreto polo que se nomea á Virgen de la Merced como patrona de los penados españoles “haciendo un acertado paralelo entre la historia de la Virgen Mercedaria y la nueva labor que se le encomienda: La redención de estos nuevos cautivos que siendo cristianos y españoles habían sido exclavizados por las cadenas del odio marxista“.
“LOS CRISTIANOS ESPAÑOLES”
“La misa fue oficiada por el capellán de la Prisión don Rafael Pato, acompañado de todo el clero del contorno, interpretando magistralmente el coro la ‘Pontificalis’ del maestro Perosi”, continúa o relato.
“Hubo por la tarde una interesante velada exclusivamente a cargo de reclusos, en que todos los actores, músicos, declamadores y discursantes estuvieron a gran altura. A estos actos asistieron todas la autoridades de la villa recordando entre otros al bizarro comandante de la heróica Bandera de Marruecos, señor alcalde y corporación, señores jueces, señores jefes de Correos, Teléfonos y Telégrafos, además del personal que integra la plantilla de esta prisión”.
“MISA POR LOS CAÍDOS”
Ás once e media celebrouse misa “ante la cruz de los Caídos, erigida en un montículo que domina la villa“.
Foi naquela data, nese lugar, onde o comandante (que non se cita, mais poidera ser Nemesio Fernández Cuesta) fixo explícito a encomenda da Falanxe ás autoridades.
“Señor alcalde, yo espero que sabréis perpetuar esta cruz que nosotros os legamos como recuerdo de nuestros muertos“, dixo. E así o fixeron todos os alcaldes franquistas e todos os alcaldes postfranquistas até hoxe.
Houbo un responso mentres o comandante, “visiblemente emocionado deposita a los pies de la cruz una monumental corona de flores recuerdo de la Falange Femenina de Celanova”.
“Todo el pueblo aclamó con delirio a los heróicos falangistas que por última vez desfilaron marciales por las calles de la villa“, remata o cronista.
Así, os presos quedaron en mans da redentora Virxe; a cruz baixo custodia das autoridades no sucesivo; e os mandos falanxistas marcharon “marciales” a facer negocios á fronte do Estado.
DOUS MESES BAIXO A BANDERA DE FALANGE
A Bandera de Marruecos foi unha unidade paramilitar, integrada no exército franquista, formada por voluntarios falanxistas de Ceuta, Melilla e o Protectorado marroquí. Na composición da Bandera predominaban os exlexionarios, acostumados a un estilo de guerra colonial, e os peninsulares residentes no Protectorado. Aínda que tamén houbo falanxistas rifeños, eran unha minoría. As baixas fóronse cubrindo con milicianos falanxistas doutras unidades peninsulares e un grupo de canarios. Porén, no recordo dos celanoveses e dos presos quedaron identificados, sen distinción, como “moros”, se cadra pola súa indumentaria que incluía o sombreiro árabe que tamén utilizaban os regulares, coñecido como fez ou tarbush. Tras cruzar á Península, foron destinados á primeira liña de fronte como “unidad de choque del mismo porte y estilo que las fuerzas de Regulares o de la Legión”, participando no asedio a Madrid.
Os falanxistas da Bandera de Marruecos chegaron a Ourense a tarde do domingo 16 de xullo de 1939. Desfilaron triunfais pola rúas da cidade ata o xardín do Posío, onde esperaban os automóbiles que os trasladarían a Celanova. Segundo o diario La Región, o destacamento estaba composto por 700 homes, 18 oficiais e 27 suboficiais que mandaba o comandante Sánchez Ocaña. De acordo co diario Arco, unicamente permanecerían na capital de provincia os servicios de Sanidade e Automobilismo.
NEMESIO FERNÁNDEZ-CUESTA
Un dos seus xefes máis destacados foi o comandante Nemesio Fernández-Cuesta, irmán do secretario nacional do Movimiento e falanxista. A pesar de que cando chega a Bandera vén mandada por Sánchez Ocaña, cónstanos a súa presenza con posterioridade en Celanova durante a inauguración da cruz e antes de marchar definitivamente. Posteriormente participou na División Azul. Á súa volta foi nomeado director de semanario Redención, destinado aos presos, e do xornal Marca, así como procurador a Cortes en varias lexislaturas durante o franquismo.
O seu fillo, Nemesio Fernández-Cuesta e Illana, casou cunha neta de Torcuato Luca de Tena e foi ministro franquista (Comercio) no goberno de Arias Navarro en 1974, o penúltimo da ditadura. O neto, Nemesio Fernádez-Cuesta e Luca de Tena, foi subdirector xeral con Felipe González e secretario de Estado de Energía y Recursos Minerales do Ministerio de Industria no primeiro goberno de Aznar (1996); vicepresidente de Vocento (Prensa Española) até o 2006; membro dos consellos de Repsol e Gas Natural até o 2015; presidente de Isolux Corsán en 2016, e presidente do fondo canadiano Eolia Renovables desde 2019.
EXECUCIÓNS E FERIDOS POLA BANDEIRA
Os dous meses e pico que estivo destinada a Bandera de Marruecos en Celanova, entre xullo e setembro de 1939, foron un alarde de fachenda e violencia. Esta unidade falanxista é responsable de fusilar a 7 presos asturianos o 22 de setembro (Abelardo Suárez del Busto, 28 anos, albanel, natural de Xixón; Alfonso Moreno Gayol, 26 anos, chofer, natural de Salamanca; Baldomero Vigil-Escalera Vallejo, 19 anos, pintor, natural de Xixón; Belarmino Álvarez García, 29 anos, mineiro, natural de Sama de Langreo; Guillermo de Diego Álvarez, 25 anos, chofer, natural de Mieres; Marcelino Fernández García, 21 anos, mecánico, natural de Mieres; e Mariano Blanco González, 36 anos, litógrafo, natural de Xixón).
Os disparos dos sentinelas desde o exterior da prisión, dos que xa había constancia antes da chegada da unidade, multiplicáronse. O 1 de agosto resultou morto como consecuencia dos disparos o recluso Cándido Alonso Escudero, de 33 anos, veciño de Bilbao e natural de Zamora. Foron trasladados ao Hospital de Ourense os reclusos José Manuel Galán, Emiliano García Martínez e José Martínez Díaz. Tamén resultaron feridos Fulgencio Sánchez, Enrique Bailach, Saturnino Vega González, Ángel Andrés Fernández, Avelino Díaz Díaz e Eladio Álvarez González. Hai constancia de máis feridos durante aqueles meses baixo a Bandera. Ás 8 da mañá do 20 de setembro resultou ferido o recluso Indalecio Rodríguez Roibal estando na cela número 5. Tamén precisou de hospitalización. Indalecio, de Mugardos, na Coruña, era membro do Orfeón e director da Orquestra que unha semana antes participara na misa da Virxe do Cristal.
JOAQUÍN RÍOS CAPAPÉ
A cerimonia de homenaxe “a los caídos de la Cruzada” o 8 de agosto de 1939 estivo protagonizada polos discursos do coronel Joaquín Ríos Capapé, xefe da 18ª División, e do tenente coronel Nemesio Fernández Cuesta, á fronte da Bandera de Marrocos, de gornición en Celanova, segundo relata a crónica do xornal falanxista ourensán Arco e outros medios. Levantaron unha cruz aos caídos no Outeiro da Obra.
La Vanguardia, o día 10, publica detalles do acto: “Se celebró Misa de campaña y seguidamente se inauguró un monumento a los héroes de la Santa Cruzada. Luego las fuerzas que asistieron al acto desfilaron al mando del teniente coronel Fernández Cuesta. Para asistir a estos actos, llegó de Orense el coronel Ríos Capapé, héroe de la Ciudad Universitaria (…). El coronel Ríos Capapé pronunció un elocuente discurso ensalzando el heroico comportamiento de 1a Bandera de la Falange de Marruecos. Se vitoreó a España y al Caudillo y finalmente se cantó el «Cara al Sol»”.
“Hoy formasteis aquí, en estas agrestes montañas, bajo este hermoso cielo gallego y ante esta cruz que es el símbolo de la paz de vuestros muertos (…). Más de 800 muertos dejasteis sobre el campo de batalla, más de 800 luceros que os contemplan y os agradecen este acto de Fe”, clamou o coronel Ríos Capapé, segundo recolle Arco.
Joaquín Ríos Capapé era fillo dun militar nado en Celanova, Manuel Ríos Fernández, destinado a Figueres (Xirona) onde naceu Ríos Capapé, o 2 de xullo de 1898. Aínda ostenta o título de fillo predilecto daquel concello. Ríos Capapé foi axudante de Millán Astray no Exército español en África a finais dos anos vinte do século pasado. Era comandante do 3º Tabor de Regulares de Alhucemas que iniciaron o golpe de Estado en Melilla días antes do 18 de xullo. En setembro de 1937 ascendeu a coronel por méritos de guerra. Á fronte da 18ª división foi un dos primeiros mandos en entrar en Madrid o 28 de marzo de 1939. Despois das vacacións en Ourense -aquel verán instalouse nun pazo na comarca do Ribeiro, desde onde fixo algunha visita a Meirás-, foi nomeado Jefe da División 91 en Ceuta, e máis adiante, xa como teniente general estivo á fronte das capitanías da 9ª, da 7ª e da 3ª rexión militar, segundo figura na haxiografía da Real Academia de Historia de España.
Ver tamén.
0 comentarios