O Orfeón de presos canta á Virxe do Cristal

A memoria do Patronato de Nuestra Señora de la Merced para la Redención de Penas por el Trabajo do ano 1940 recolle que nas Prisións Centrais do sistema penitenciario do Estado había 437 presos que participaban en bandas de música, 231 en orquestras, 1.422 en orfeóns e 905 en rondallas.

Desde o ano anterior, na Prisión Central de Celanova funcionaban un orfeón e unha orquestra, que adoitaban a participar fóra do cárcere en actos relixiosos.

No verán de 1939, con 1.700 reclusos (segundo o reconto a 1 de setembro) e a presenza da Bandera de Falange de Marruecos, as celebracións de carácter relixioso como as misas do Corpus en xuño, a procesión da Encarnación en agosto ou a misa da Virxe do Cristal en setembro contaron con participación de militares (hai testemuña gráfica no caso da procesión da Encarnación) e presos, obrigados estes baixo o programa estatal de redención de penas que incluía rebaixas polo “esforzo intelectual”.

Só unha semana antes de que a Bandera de Falange de Marruecos asasinara a sete presos asturianos contra o muro oeste do cemiterio de San Breixo, o venres 15 de setembro de 1939 o Orfeón de presos da Prisión Central de Celanova tomou parte na celebración relixiosa da Virxe do Cristal, en Vilanova dos Infantes.

Solicitude de permiso á Dirección General de Prisiones

Con data do 26 de agosto, o director da Prisión Central, Vicente Fonturbel, envía un oficio á Dirección General de Prisiones en Madrid no que dá conta da petición do cura párroco de Vilanova para que o Orfeón “pudiera contribuír con su arte a la mayor solemnidad” da celebración “cantando la Misa” o día 15 en Vilanova dos Infantes á Virxe do Cristal. O director engade que “en caso de autorizar la salida, los reclusos serán reintegrados a la prisión tan pronto terminara el Santo Oficio”.

Uns días antes, o 18 de agosto, o director tiña escrito ao Jefe del Servicio Nacional de Prisiones, do Ministerio de Justicia, para informar de que na Prisión Central de Celanova xa se constituíra un coro “con 44 orfeonistas”, unha agrupación “que viene funcionando con notable éxito”, e que para cumprir as instrucións da Jefatura de crear unha orquestra identificárase na cadea a “22 individuos que conocen el manejo de instrumentos de música y que están dispuestos a formar parte de la Orquesta”. O director sinalaba a falta de “instrumental necesario”.

A lista de membros do Orfeón que difundimos consérvase na Correspondencia da Prisión Central de Celanova no Arquivo Histórico Provincial de Ourense. É unha lista que a dirección do cárcere envía o 2 de decembro ao Patronato Central para la redención de penas cos nomes dos que actuaron co coro durante o mes anterior. Consígnanse 36 nomes, o primeiro, o daquela director do coro, o preso Juan Montes Gorostiaga, profesor de música de Donostia, condenado por un delito sexual antes do golpe de Estado e que morrería, enfermo, no cárcere de Celanova meses despois.

Prisión Central de Celanova, 2 de decembro de 1939. “Relación de componentes del Orfeón” que participaron en actividades no mes de novembro.

1	Juan Montes Gorostiaga
2	Indalecio Rodríguez Roibal
3	Federico Fernández Luaña
4	José García Rilla
5	Anastasio León Payo
6	Luis Álvarez Prendes
7	Leoncio González Moro
8	Celso Quirós García
9	Marcelino Neiras Álvarez
10	Constantino Álvarez Fernández
11	Miguel Burundarena Vaqueriza
12	José Miranda Miranda
13	Rogelio Morán Suárez
14	José Benedé Cubero
15	Ángel Fernández Rodríguez
16	Emilio Mansilla López
17	Aurelio Cano Panizo
18	Pablo Méndez Beltrán
19	Leonardo Ángel Fernández
20	Avelino Saldoval Vázquez
21	Miguel Posada Gómez
22	José Álvarez Medina
23	Luis Alonso Sánchez
24	Rafael Piedra Fernández
25	Manuel Alpérez Novoa
26	Antonio Vázquez Álvarez
27	Antolín Prada Velázquez
28	Francisco Fernández González
29	Víctor del Riego Cancedo
30	Rafael Gutiérrez Vega
31	Arturo Vega Vega
32	Eugenio de la Fuente Zapater
33	Eugenio Rueda Pedrosanz
34	Julio Prieto García
35	José Zapico Roces
36	Víctor Fernández Morán

Prisión Central de Celanova, 18 de agosto de 1939. “Lista de individuos que desean formar parte de la Orquesta”.

1	Indalecio Rodríguez Roibal
2	Juan José Lombardía López
3	Emilio Mansilla López
4	Antonio Casillas Rivas
5	Demetrio Rodríguez Duque
6	Martín Pilar Sánchez
7	Manuel Marqués Fernández
8	José Pérez Otero
9	Victorino Cubo Cubo
10	Domingo Miralles
11	José Fotanet Fontanet
12	Estanislao Pérez González
13	Pablo Méndez Beltrán
14	José David Cato Margolles
15	Francisco León
16	Inocencio Pérez
17	Anastasio León
18	Dionisio García Salinas
19	Federico Fernández Luaña
20	Narciso Pérez
21	Alberto Vidueira
22	José Benito Álvarez-Buylla
23	José Antonio Suárez Fernández

O preso e profesor Indalecio Rodríguez Roibal

A lista dos compoñentes da futura Orquestra figura anexa ao documento do 18 de agosto. Aparecen finalmente 23 nomes. Con cada un deles indícase o instrumento que toca e se se dispón ou non do mesmo. O director é Indalecio Rodríguez Roibal, de Mugardos, preso en Celanova desde abril e que en novembro ten unha anotación favorábel no se expediente “por su actuación y colaboración entusiasta en el mejoramiento del Orfeón de la Prisión y en su cargo de profesor de solfeo”. Indalecio estivo preso no castelo de San Felipe (Ferrol) desde setembro do 37, condenado a vinte aos por “auxilio a la rebelión” (acusábano de facer parte da resistencia popular en Mugardos contra a sublevación). En xullo de 1940 obtivo a liberdade condicional e volveu a Mugardos.

Indalecio foi un dos presos tiroteados por sentinelas de garda desde o exterior da prisión, unha práctica que incrementou os incidentes desde a chegada da Bandera de Falange de Marruecos en xuño. Indalecio foi ferido de bala ás 8 da mañá do 20 de setembro de 1939 estando na cela número 5. A bala, disparada por un sentinela desde o exterior, entroulle polo sétimo espacio intercostal posterior dereito e saíu polo terceiro anterior, segundo figura no informe do médico, que conclúe: “El pronóstico es grave”.

Noutra comunicación do mes de decembro daquel ano, o director da Prisión, Vicente Fonturbel, solicita á Dirección General de Prisiones “dos mandolinas, dos bandurrias y un laud para la formación de la Orquesta” e informa de que nos actos artísticos e relixiosos dos que participa o Orfeón fan parte 87 voces.

“La música como ente pedagógico y cultural fue convertida en medio para lograr la redención de la pena a través del sometimiento ideológico, cultural y moral, o en palabras del régimen, del esfuerzo intelectual. Por este motivo se articuló un sistema pedagógico y artístico que partiendo de las bases implantadas desde el Ministerio de Educación Nacional, de Justicia, de Propaganda, de la Iglesia y en definitiva de la autoría radiada de quien accedió en ese momento a las riendas del país, se hiciese eco de los nuevos valores e ideales que debía adoptar y acatar la población penitenciaria española. Se iniciaba así la reconversión del vencido. La extinción del «otro cultural»”, resume a investigadora da Universidad Autónoma de Madrid, Elesa Calero, nun dos seus numerosos traballos sobre a utilización da música nos espazos carcerarios do franquismo.

---

FONTES:

• Correspondencia: redención de penas polo esforzo intelectual do ano 1939. AHPOU.
• Expediente do recluso Indalecio Rodríguez Roibal. AHPOU
• Calero Carramolino, Elsa (2016). La música os hará libres o el modelo penitenciario del franquismo para la redención de penas por el esfuerzo intelectual. El Patronato de Nuestra Señora de la Merced. AV Notas. Revista de Investigación Musical, nº 1.

DOCUMENTOS

(foto 1) 26.08.1939 Comunicación da Prisión Central coa Dirección General de Prisiones solicitando permiso para que o Orfeón cantase a Misa do 15 de setembro en honra da Virxe do Cristal.

(foto 2) Lista de presos con habilidades musicais para formar a Orquestra, na comunicación da Prisión Central co Jefe del Servicio Nacional de Prisiones en agosto.

(foto 3) Lista de presos que participaron nas actividades do Orfeón durante o mes de novembro, nunha comunicación en decembro á Dirección General de Prisiones.

(foto 4) Primeiro parte médico sobre as feridas ocasionadas ao recluso Indalecio Rodríguez Roibal polo disparo dun sentinela a mañá do 20 de setembro de 1939.