Realizadas as probas de ADN a dúas familiares dos asturianos da fosa de Celanova

O equipo de Histagra, da Universidade de Santiago de Compostela, e a Viceconsejería de Presidencia del Gobierno de Asturias mantiveron o 17 de xaneiro pasado a primeira reunión conxunta para iniciar os trámites que permitan exhumar este ano, 2022, a fosa do cemiterio de Celanova, documentada polo Comité de Memoria Histórica da Comarca de Celanova, na que poderían estar soterrados sete milicianos asturianos fusilados o 22 de setembro de 1939 por un pelotón da Bandera de Falange de Marruecos.

Fernando Serrulla*, médico forense que fai parte do equipo de Histagra, encargado pola Xunta de Galiza de levar adiante exhumacións en Vilagarcía de Arousa e Crecente no segundo semestre de 2021, viaxou esta semana a Oviedo para realizar as probas de ADN a dúas familiares de dous dos asasinados en Celanova aquela mañá de setembro de 1939.

O Comité de Memoria Histórica da Comarca de Celanova, que contou desde o principio co apoio do Goberno de Asturias, organizou un acto no Instituto de Celanova, prisión central desde a guerra até 1943, de homenaxe aos 7 fusilados o pasado 25 de setembro. A raíz da divulgación da súa memoria, apareceron familiares de dous dos asasinados: Abelardo Suárez del Busto e Marcelino Fernández García. Unha das familiares, Gracia, neta de Abelardo, visitou Celanova en outubro. Coa filla de Marcelino, Josefa, o Comité entrou en contacto a finais dese mesmo mes.

*O nome do médico é Fernando; non Francisco como por erro figuraba na nota de prensa do día 10.02.22